MOBILízate pola selva

Recicla o teu móbil e protexe os ecosistemas africanos!

07 agosto 2009

Obra Social de Caixa Galicia colabora co Instituto Jane Goodall na difusión da campaña “MOBILízate pola selva” para conseguir reciclar móbiles e protexer os ecosistemas africanos.

Na actualidade a taxa de reciclaxe de móbiles é menor do 5%. En España hai máis de 52.000.000 de liñas de teléfonos móbiles. A este impresionante número de terminais deben agregarse aqueles móbiles máis antigos que se substitúen e que os cidadáns gardan ou tiran ao lixo.

A explotación do valioso mineral coltan que fai posible a tecnoloxía dos nosos móbiles, ordenadores e consolas é o centro de conflitos bélicos que producen centos de miles de vítimas e refuxiados na República Democrática do Congo. A explotación mineira ilegal utiliza man de obra semiescravizada, destruíndo tamén os hábitats de moitas especies africanas, como os chimpancés e os gorilas, en grave perigo debido á caza furtiva e á deforestación.

Queres protexer os ecosistemas africanos? Como podes colaborar?

Achega o teu móbil en desuso! (en funcionamento ou non), ou recolle algún entre os teus amigos, familiares ou compañeiros!. Así contribuirás a:

• Reutilizar terminais e reducir a insostible demanda dos seus compoñentes.
• Reciclar elementos útiles e dispor adecuadamente de materiais tóxicos, evitando a contaminación do medio.
• Recadar fondos para os programas de educación e conservación no Congo, coma o do Centro de Recuperación de Chimpancés de Tchimpounga.

Por cada teléfono reciclado….

• Fonebank achegará unha parte do seu valor ao Instituto Jane Goodall, segundo o modelo do terminal.
• O Instituto Jane Goodall sorteará mensualmente apadriñamentos Chimpamigos entre os doadores, como agradecemento e para mostrarlles o impacto positivo do seu ingreso. Para o sorteo debes inscribirse en info@movilizateporlaselva.org tras o envío a Fonebank.

As organizacións tamén poden participar na campaña

Aquelas entidades que recollan 30 ou máis móbiles poderán solicitar unha recollida gratuíta a domicilio, chamando ao 902 929 605 e achegando o adhesivo ao seu envío. O Instituto Jane Goodall regalará unha subscrición anual a Chimpamigos por cada un destes envíos.

Envía os teus móbiles por correo

• 1. Descarga o adhesivo pre-franqueado e escribe o teu nome e correo electrónico
• 2. Pega a etiqueta no sobre acolchado ou na caixa e introduce o teu teléfono móbil con batería pero sen cargador, nin tarxeta SIM nin outro elemento.
• 3. Deposítaos gratuitamente en calquera oficina de Correos do territorio español

 MOBILízate!

Por pequena que sexa a achega, entre todos e todas podemos marcar unha gran diferenza. Así que MOBILízate! Parte da solución está nas nosas mans...

Máis información ou consultas en info@movilizateporlaselva.org

Folleto da Campaña MOBILízate pola selva ( Pdf Galego)

Póster da Campaña MOBILízate pola selva ( Pdf Galego)