Caixa Galicia inviste en 13 proxectos sociais que beneficiarán a 30.000 persoas con discapacidade

A IV convocatoria de axudas a proxectos sociais de Obra Social Caixa Galicia, no eido da discapacidade, destina as súas subvencións a residencias e equipamentos, servizos de inserción e intermediación laboral, a centros especiais de emprego e a transporte e a actividades de lecer e tempo libre

16 decembro 2009

Obra Social Caixa Galicia aprobou un investimento de 344.000 euros para financiar 13 proxectos sociais que beneficiarán a 32.000 persoas con discapacidade física, psíquica e sensorial.

A IV Convocatoria de Axudas a Proxectos Sociais de Obra Social Caixa Galicia, no eido da discapacidade, destina as súas subvencións a residencias e equipamentos, servizos de inserción e intermediación laboral, a centros especiais de emprego e a transporte e a actividades de lecer e tempo libre para persoas con discapacidade.

O total da convocatoria son 550.000 euros e 31 proxectos, os 18 restantes van dirixidos a entidades que traballan con colectivos vulnerables e especialmente afectados pola crise. 

As entidades seleccionadas, entre as que se encontran 4 federacións que desenvolverán as súas actuacións en toda Galicia, xestionan un total de 19 millóns de euros anuais, contan con 670 empregados e 1.183 voluntarios.

Segundo datos destas entidades, os proxectos apoiados por Obra Social beneficiarán a máis de 30.000 persoas e prevén xerar máis de 975 empregos directos.

O 77% das entidades seleccionadas contan con todos ou algún dos seus servizos certificados segundo a norma de calidade ISO 9001 e 4 delas co selo EFQM. Estes datos son unha mostra da aposta que dende este sector se está realizando en Galicia pola prestación de servizos de calidade e da importancia outorgada por Caixa Galicia a este aspecto, tanto na selección de proxectos, como na preparación das entidades para este reto, xa que todas elas participaron nalgún dos programas de formación de Socialia Calidade.

A convocatoria de axudas sociais é un instrumento máis para desenvolver os obxectivos estratéxicos da acción social de Caixa Galicia para este ano, un ano no que se decidiu centrar esforzos e programas en axudar os máis desfavorecidos e impulsar todos aqueles proxectos que primen a creación de emprego, especialmente nun eido tan necesitado como o da discapacidade.

Máis información sobre a Resolución da IV Convocatoria de Axudas Sociais