Empregados de Caixa Galicia entregan xoguetes a nenos hospitalizados

Cúmprese o segundo ano do programa de Voluntariado Corporativo de Caixa Galicia

02 febreiro 2010

Voluntarios de Caixa Galicia repartiron preto de 200 xoguetes en hospitais de Santiago de Compostela, Vigo, A Coruña  e Madrid, nunha iniciativa dirixida a nenos de todas as idades e que baixo as indicacións do persoal sanitario fixo posible o obxectivo de alegrar a convalecencia a decenas de infantes.

Os xoguetes foron recompilados durante o mes de xaneiro entre todo o seu persoal e logo entregáronse a nenos con diversas doenzas dos hospitais Clínico de Santiago de Compostela, Ramón e Cajal de Madrid, Xeral Cíes de Vigo e Materno Infantil da Coruña.

Segundo ano do programa de Voluntariado Corporativo de Caixa Galicia

Con esta iniciativa comeza o segundo ano de vida do programa de Voluntariado Corporativo de Caixa Galicia, nacido en abril de 2009 en liña coa súa política de Responsabilidade Social Corporativa, e co que Caixa Galicia pretende facilitar aos seus empregados a participación en iniciativas altruístas.

O programa creouse tras unha consulta interna  que permitiu analizar a disposición tanto dos seus empregados activos como da súa asociación de xubilados cara a este tipo de iniciativas, o que facilitou á entidade unha orientación das súas propostas acorde cos intereses dos 900 empregados que se pronunciaron favorables a participar.

Iniciativas realizadas

Ata a data promovéronse diversas experiencias piloto que foron desde campañas de doazón de sangue, coa participación de 86 empregados, ata a entrega de 100 cestas de Nadal á Cociña Económica. 

Das iniciativas propostas pola entidade optouse inicialmente por aquelas que permitisen unha participación puntual en que se conciliase a diversión co altruísmo, con exemplos como a participación en talleres lúdicos con persoas discapacitadas, unha ruta multicultural en bicicleta ou a oferta de vacacións solidarias, que a caixa galega apoiou doando un día de vacacións adicional aos participantes.

Para Caixa Galicia, este programa descobre novas formas de socializar os seus empregados, tal e como leva facendo o seu club de empregados, Club Caixa, desde hai máis de 30 anos, conectando aos seus empregados con iniciativas de lecer que fomenten as relacións persoais alén do ámbito estritamente profesional.

Así mesmo, no ámbito da solidariedade, Caixa Galicia recoñece que o seu programa de Voluntariado Corporativo é unha excelente oportunidade para involucrar os seus empregados na cultura do asociacionismo e a colaboración cidadá, en liña coa aposta que Obra Social Caixa Galicia fixo durante todo o ano 2009 coa campaña “Solidarízate”, que permitiu vincular  máis de 140 oenegués con 700 novos voluntarios do territorio galego.